элерондар

(франц. aileron, alie — қанат)

1) ұшақтың қанатының артқы бөлігіне (бір элерон қанатының оң жақ бөлігіне, екіншісі – сол жағына) орнатылатын бөлшек. Ол ұшақтың көлбеу бағытын басқаруға, яғни ұшақты қисайту мен одан шығаруға арналған. Э. басқаруды ұшқыш басқару тетігін қисайту арқылы жүргізеді. Мұнда бір Э. төмен түсіріледі, екіншісі жоғары көтеріледі, сөйтіп айналған сәтте ұшақты қисайтады немесе қисаюдан шығарады.

2) қанатты ракетада қанаттың жалғасы (бөлігі) болып табылатын тетік, әдетте, Э. ракетаның қисаюын реттейді және әр бағытта айналады. Кәдімгі Э-дан өзгеше ракеталарда аспалы элерон (қанаттың астында), қанат үсті Э. (қанаттың үстінде болады), қанат алды (қанаттың алдыңғы бөлігінде) және қанат ұшы (қанаттарының ұшында) Э-дары қолданылады.